مدينة الرياض
24 ℃
مدينة جدة
30 ℃
مدينة مكة
33 ℃
الجمعة, 14 شعبان 1440 هجريا, الموافق 19 أبريل 2019 ميلاديا

‏ابيك العُمر من إبداعات الشاعر عامر بن شنيّف

‏ابيك العُمر  من إبداعات الشاعر عامر بن شنيّف
صحيفة برق
برق القوافي _ برق

{ لا تُلام الأقلام حين تكتب وتُعبّر فما بال القلوب حين تكتب تُدمي وحين تُعبر تُبكي وحين ترجف تُزلزل ، هنا عليكم التأمل بصباحات الشاعر عامر بن شنيّف :}

صباح عيونك النـجـلا ونبـرة صـوتك المبـحوح
صباح الشوق ، ياشوق الحزين اللي سهر مانام
.
وصباح رموشك الكسلا وقُـبلة وجهك المملوح
وثغرٍ بـسمته ،، تكـسر شمـوخ الفارس المقدام

وصباح الضحكه اللي لو دروا عن وقعها بالروح
خذوها ،، تسـعد قْلوب اليتاما في سكن الايتام

وصباح قلوبنـا ،، اللي وضعها لظروفنا مشروح
وعـيّت لين شـدّيتـك مــعـاي نـعـانـق الاحـلام

وصباح احلامنـا اللي لا ابتدا ليل الشقا والنوح
دخلنا من وزى الواقع بجاه ، الحلم ، والأوهـام

وصباح الدمـعه ، اللي تعكـس البرّاق يوم يلوح
على صـدق القـلوب اللي تمـنّت حظّـها لو قام

وصباح الحزن والضيقات لااوحينا حمام الدوح
يجُـر لـحونه ، وحـنا تحـتْ غـصنه لـنا هـمـهام

واذا ضاقت عليه الارض له صدر الفضا مفـتوح
بـلا ويـن ،، وبـلا لـيـه وبـلا ما عُـقـبه استـفهام

وانا لا من بغيـت اوصـل اوقف ما معي مصلوح
منعني ( سـلـم جـدّاني ) احث لـغايـتي لأقـدام

فأبي منـك الرضا ،، والله يجـعل مابــدر مدموح
وقـبل تلعبّـك ظـنونك واصـيـر بمـوقف المنلام

انا ما املك عصا مـوسى ، ولا عندي سفينة نوح
ولا خاتم سليمـان وحُكم ارض اليمـن ، والشـام

انا رجـلٍ ولـدْت بقـلب عـن ما يـرغـبـه مـكـبوح
تشتّت ،، وعجزت اعرف ورا ظُلمي من الـظـلّام

ولدت وشـفت لذّات الـعُمر في دمّـها المسفوح
وبكيت مْن الحزن وامي بكت فرحه وانا منضام

بصغْري ألهج ابهـامـي من اللي فالضـمير يفوح
وكبرت وصرت ماشـاء الله أعرْف لعضّـة الابهام

وتقافى العمر ، مـا خايلت لبروق السعاده ضوح
الين انْه أنتـصف عمري ورغـبات الضمـير حيام

تمنّـيـت القـدر يصدف بـشيٍ ، أكبـر مْـن الـبوح
ويبقى ( بيـني وبيني ) وبـصـبر والــوعـد قـدّام

إلين الله يرحـمـني ، ويـرحـم قـلـبي الـمـجـروح
وأشـوف ظـروفي اتـلـوّح علـيّ برايـة أستسلام

سـكـوتي دافـعه ايـمـان بـإن اللي كِـتب فاللـوح
نصيب العـبد لو دونـه تحـيـل الخـلـق ، وآلأيام

لكنّ ابقى معاي ايام تسـوى سنـين ، قبـل تروح
تراك بكل ليـله ، تشفـي مْن سنـين جرحي عام

ابيك العُمر ، وان عيّا الزمان ، محلّل ومسـموح
انا اصلاً عشيـر ( الجـرح ، والـحرمـان ، والآلآم )

التعليقات (٠) اضف تعليق

اضف تعليق

بريدك الالكترونى لن نقوم بأستخدامه. الحقول المطلوبه عليها علامة *

You may use these HTML tags and attributes:
<a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>

*